Маңғыстаумұнайгаз: Кәсіподаққа мүше болу - мүмкіндіктер кепілі

Кез келген іргелі кәсіпорындарда, қандай да ұйымда жұмысшылар мен ұжым мүшелерінің мүддесін қорғайтын ұйым – кәсіподақ. Бірақ біз көбіне кәсіподақтың қызметін нақты біле бермейміз. Білсек те назар аудара бермейтініміз рас.

Кәсіподақ қызметі, кейбір адамдар ойлағандай, санаторий мен емдеу-сауықтыру орындарына жолдама, қызметкерлерге материалдық көмек берумен, қайырымдылық іспен шектелмейді. Түсіне білсек, оның қызметкерлерге берер қолдауы көп. Ақиқатына келсек, кәсіподаққа мүше болу — ол сенің үлкен мүмкіндігің.

Мұнайшылардың лайықты өмір сүруі, қызметкерлердің хал-ахуалын жақсарту бағытында атқарылған биік міндеттің үдесінен шыққан Кәсіподақ ұйымы бүгінде «халық қызметшісі» деген абыройлы атын қалыптастырып үлгерді. Компания қызметкерлерінің ынтымағы мен бірлігі – еңбек ұжымының әлеуметтік тұрақтылығының кепілі десек, осы тұрғыда компаниядағы басшылық пен еңбек ұжымы арасындағы кері байланысты нығайтып, сындарлы диалог орнатуда табанды жұмыс істеп отырған компания Кәсіподағының ауыз толтырып айтар ауқымды жаңалықтары көп-ақ.

Бүгінде 3300 ден астам мүшесі бар ұжым үш жыл ішінде жұмысшыларға разряд беру, вахталық ауысымның ұзақтығын 12 сағатқа ұзартып, әлеуметтік төлемдердің қатарын едәуір көбейтті. Бұдан өзге, жұмысшылар арасында мәдени-спорттық шаралар, тренингтер және семинарлар ұйымдастыру арқылы ұжымдық рухты көтеруге бағытталған іс-шараларды жиі өткізеді.

Кәсіподақ жанынан құрылған Келісу комиссиясы жұмыс беруші тараптың әділетсіз қысымынан, заңсыз шешімінен зардап шеккен әр жұмысшының талап-арызы бойынша тиісті келіссөздер жүргізу арқылы, көптеген мәселелердің шешілуіне тікелей атсалысты.